Беларуская атамная
электрастанцыя

Пытанні бяспекі Беларускай АЭС сталі для пэўных палітычных сіл Літвы прадметам пастаянных спекуляцый, магчымасцю «зарабіць балы» ва ўгоду ўласным інтарэсам. Для гэтага фармуецца вобраз Беларусі як крыніцы пагрозы ядзернай бяспецы ў Еўропе.

Большасць прэтэнзій літоўскага боку, у тым ліку тэзісы рэзалюцыі, грунтуюцца на здагадках, не маюць пад сабой абгрунтаваных аргументаў, а ў асобных выпадках — утрымліваюць недакладную інфармацыю. У прыватнасці, у дакуменце гаворыцца аб загрузцы ядзернага паліва ў актыўную зону рэактара першага энергаблока БелАЭС без адпаведнага дазволу рэгулюючага органа, нейкіх незаконных работах і безадказным развіцці ядзернай энергетыкі, што не адпавядае рэчаіснасці.

Мы разлічваем, што міжнародная супольнасць здольна аб'ектыўна ацаніць сітуацыю і не будзе браць пад увагу падобныя, відавочна палітызаваныя, не пацверджаныя фактамі ацэнкі літоўскага боку.

Збудаванне Беларускай атамнай электрастанцыі ажыццяўляецца ў адпаведнасці з усімі неабходнымі патрабаваннямі бяспекі. Гэта неаднаразова пацверджана місіямі МАГАТЭ, ацэнкамі іншых аўтарытэтных міжнародных арганізацый, з якімі Беларусь супрацоўнічае на пастаяннай аснове.