Мерапрыемства прайшло ў лесапаркавай зоне горада ля помніка савецкім воінам і партызанам. Адкрыў мітынг старшыня Астравецкага райвыканкама I. Я. Шалудзін. «Гэта асаблівае, самае ўшанаванае свята для кожнага беларуса, сапраўды ўсенароднае свята са слязамі на вачах. 9 Мая - рэха часу, калі ў цяжкіх умовах, крок за крокам, народ вызваляў сваю зямлю ад акупантаў. У нашай памяці назаўжды застанецца гераізм тых, хто ў гады Вялікай Айчыннай вайны здолеў вытрымаць усе выпрабаванні. 74 гады таму савецкі народ атрымаў перамогу ў самай страшнай крывавай вайне. І гэты дзень назаўсёды застанецца днём вялікага народнага подзвігу», – адзначыў у сваім выступленні кіраўнік раёна.

Падчас мерапрыемства адбылося асвячэнне мемарыяльнай пліты, з імёнамі жыхароў Астравецкага раёна, якія загінулі на франтах Вялікай Айчыннай вайны.

Таксама, падчас мітынгу адбылася пасадка алеі «Бэз перамогі», у якой узялі ўдзел ветэраны вайны і працы, прадстаўнікі ўлады, грамадскіх арганізацый.

Прадстаўнікі працоўных калектываў і арганізацый Астравецкага раёна ўсклалі вянкі і кветкі да помніка воінам вызваліцелям.

Завяршыўся мітынг урачыстым праходжаннем воінскіх падраздзяленняў, сіл МНС і Міністэрства ўнутраных спраў.